MATTHEW 28:19-20

"Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law, (v. 20) kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai," tiah a ti hna."

"Go therefore and make disciples of all nations, baptizing them in the name of the Father and of the Son and of the Holy Spirit, ²⁰ teaching them to observe all that I have commanded you. And behold, I am with you always, to the end of the age" (ESV).

JOHN 20:21

"Jesus said to them again, "Peace be with you. As the Father has sent me, even so I am sending you." (Cun Jesuh nih cun, "Nan cungah daihnak um ko seh, Ka Pa nih a ka thlah bantukin kei zong nih kan thlah ve hna," tiah a ti ṭhan hna).

INTRODUCTION:

• Lunglawmhnak Bia Chimnak: Pathian, director, committee, le inntek.
• TGCS hi cawnpiaknak nakin biaruahnak deuh si caan nazi pakhat chung lawng topic pekmi chimnak caan kan ngei. Cu chung ah cun chim khawh kan i zuam lai i, biaruahnak le thlacamnak deuh in caan kan hmang te hna lai.
• TGCS cu Mission Conference a si. CBCUSA nih Avoi 1-nak bik tuahmi Mission Conference a si. Kan pehzulh lai ka zumh i, kan zulhpiak ko uh, tiah forh zong kan duh hna.
• Mission Conference si caah Mission kong tam bikin kan chim ding a si; bia kan i ruah ding a si. Sihmanhsehlaw, tutan Conference ah kan i ruah khawh dih hna lai ka zum lo. Cucaah, biapi deuh in kan thimmi (focus duhmi) cu Jesuh Khrih nawlpekmi le biacahmi thil (5) hi an si: Kalnak, Chimnak, Sernak, Tipil-peknak, le Cawnpiaknak.
• Tuzan ah kan i ruah dingmi cu: "KAL" timi hi a si lai. Kan hmuitinhmi cu:
  • Chin khrihfabu hi "A KALMI" si usih (A church that obeys the Great Commission).
  • Mission Rianttuanmi Khrihfabu si usih (Missional Church).
  • Zultu Sermi Khrihfabu si usih (Disciple-Making).
  • Thawngtha Karhternak Rian (Evangelism) ah thazang chuahmi Khrihfabu usih.

DAL 1-NAK: KHRIHFABU FIANTERNAK

A. Khrihfabu "Biafang" Fianternak.

1. Bible chungah "Khrihfabu" timi hi Matthai 16:18 ah hmuh hmasa a si. Greek in "ekklesia" ti a si i, "kawh-auhmi mibu" (called-out group) tinak a si.
2. A sullam cu Khamhmi zumtu, hmunkhat ah aa pum i, Pathian biami le Mission riantuanmi hi kan si. Bawipa nih mission tuan dingin kawh-auhmi hna an si.
3. Matthai 16:18 ah Jesuh nih "ka khrihfabu" a ti. Khrihfabu ngeitu hi Jesuh a si. Jesuh nih "ka dirh lai" a ti. Khrihfabu dirhtu hi Jesuh a si. Cucaah, Khrihfabu cu Jesuh nih a fialmi rian, a dirh hnawhchan rian ttuan ding ah ummi kan si.
4. Khrihfabu cu Pathian Khrihfabu a si (Acts 20:28); Pathian innchungkhar a si (1 Tim. 3:15-16).
5. Khrihfabu cu, a Ngeitu le a Dirhtu Jesuh nih a fialmi rian a um. Cucu, Miphun vialte hna sin ah "KAL" in Khamhnak Thawngtha chim phuannak, Zultu Sernak, Tipilpeknak, le Cawnpiaknak hi an si (Matt. 28:19-20). Cucu Pathian Sunparnak le Pennak caah a si Khrihfabu um hnawhchan a si.¹

B. Lai Khrihfabu Derthawmnak

1. Khrihfabu um hnawhchan kan i fiang lo.
2. Khrihfabu hi miphun, ca/holh, le nunphung kilvenak ah kan ruah sual.
3. Khrihfabu structure le bylaw nih ttemttawn ruangah ah.
4. Hruaitu sersiam (equip) kan daithlang (i.e., mission issues).
5. Kan khiarciar – kan chawva kan siang lo.
6. Khrihfabu lenglei mission rianttuan nakin khrihfabu chunglei kan focus.
7. Mission rian hi department pakhat ca lawngah kan ruah.
8. Mission thawngtha chim phuannak a chambau.
9. Ramkhel le kan ram harnak/buainak nih a hnursuan ruang ah,
10. Traditional khrihfabu le tthithruainak in kan um rih.

C. Khrihfabu um hnawhchan cu Mission rianttuan a si.²

1. Mission um caah khrihfabu a um. Khrihfabu cu mission nih hrin mi a si. Mission caah nungmi kan si. Khrihfabu cu mission rianttuannak a um lo ahcun a thi. Khrihfabu kan thisen, kan thisa ah hin mission hi a um awk a si.
2. Mission rianttuannak hi mission department ca'h lawng a si, ti kan ruah ahcun khrihfabu mission a tthawng kho lo. Kan dihlak in missionary kan si, ti lungput ngeih lawng ah a tthawng kho lai.
3. Khrihfabu a thi kan timi hna hi pumh lo le biakinn khar lawng hna khi rak chim duhmi a si lem lo. Mission rianttuan lo hna hi khrihfabu thih phunkhat a si.
4. JD Greear: "Mission a ttuan lo mi khrihfabu cu, khrihfabu an si lo. Nawlngai lo zumtu, aa lengkai sawhsawhmi an si."
5. D.A. Carson: "A dammi Khrihfabu cu Mission rianttuan lai, Zultu Ser lai. Mission ttuan lo mi cu a thimi khrihfabu an si."
6. Mark Dever: Khrihfabu Um Hnawhchan cu Pathian Biaknak (worshipping), Zultu Sernak (edifying), le Vawleicung Khuazakip ah Khamhnak Thawngttha Biaktak Chimnak (evangelizing) in Pathian Sunparnak Pek a si."
7. William Carey: "Pathian duhnak theihnak cu, Bible le vawleipi map ah um."
8. Oswald. J. Smith: "Khrihfabu nih aa hmaithlak hmasa bik ding cu vawleicung khuazakip ah Thawngtha phakter hi a si"
9. John Piper: Vawleicung ah zumtu phun (3) kan um: Lungtho tein mission riantuan ah kalmi; lungtho tein missionary thlahmi, le nawlngai lo mi zumtu.

D. Pastor hi ministry leader kan si.³

1. Jesuh nih fialmi mission rian ttuannak ah hruaitu bik, asiloah, ttuanvo ngeitu bik hi Pastor kan si. Pastor nih vision, planning, le method hi kan ruah ding a si; kan mipi kan chimh, kan hrawmh hna ding a si; an ttuan khawh nakhnga an nun timhlamh/sersiam (equip) a si (Eph. 4:11-12). Thazang pek a si. Bawmh a si. Dirkamh a si. Theihpi a si. Tlangtlak a si.

DAL 2-NAK: MISSION FIANTERNAK

A. Mission Biafang Fianternak

1. Mission cu Latin Verb "Missio" in a rami a si i, "Thlah" (sending) tinak a si.⁴

B. Mission cu Pathian in aa thok, Pathian mission a si (Missio Dei).

1. Pathian nih a Fapa Jesuh cu vawlei ah a thlah (John 3:16; Mark 10:45).
2. Jesuh nih Khrihfabu cu a thlah ve (John 20:21; 17:18).
3. Khrihfabu cu "Thlahmi" a si (Acts 1:8; Acts 13:2-3).

C. Latin biafang "Missio" cu Bible biafang "apostle" (lamkaltu) he aa naih bikmi a si.

1. Lamkaltu, timi cu "thlahmi" (who is sent) tinak a si.⁵
2. Lamkaltu, timi cu, "bia phortu" (messenger) tinak zong a si.
3. Lamkaltu, timi cu, "fialmi" (commissioner) tinak le,
4. Lamkalatu, timi cu, "aiawhtu caah thlahmi" (delegate or ambassador) tinak a si.

D. Pathian cu Thlahtu Pathian a si.

1. Abraham cu a kamhmi ram ah thlah (Gen. 12).
2. Joseph cu chungkhar cawmtu dingah Egypt ah thlah (Gen. 39).
3. Moses cu miphun chanchuahtu dingah Egypt ah thlah (Ex. 3).
4. Prophet hna cu Israel miphun/ram ah thlah hna (Isa. 6).
5. A Fapa Khrih Jesuh zong vawlei misual kawltu, khamhtu, le tlanhtu dingah thlah (John 20:21; Luke 19:10; John 3:16).
6. Thiang Thlarau cu tlanh cangmi Pathian fa le bawmtu le lamhruaitu dingah thlah (John 14:16-17, 14:26, 16:7).

E. Mission cu Khamhnak Thawngtha chimtu minung thlah a si.

1. Jesuh Khrih nih a zultu thlah hna (Matt. 10:1; Luke 6:12-13).
2. Zultu ti a sullam cu, "siangngakchia, asiloah, a cawngmi" tinak a si.
3. Jesuh nih a thimmi zultu hna cu kum thum hrawng a cawnpiak (teach) hna, an nun sersiam (equip) hna (Mark 6:7-13; Eph. 4:11-12).
4. Cu hnu ahcun Jesuh nih a "thlah" tthan hna (John 15:16; Luke 9:1-2). Cu a thlahmi hna cu "Lamkaltu" tiah a ti hna.
5. Zultu (a cawngmi) sinak in, lamkaltu (thlahmi) sinak hi hmuitinh a si. Tahchunhnak ah, biakinn chung kan um tikah zultu kan si; biakinn leng in kan chuah in thlahmi, Khrih lamkaltu kan si (Rom. 10:14-17; Matt. 28:19-20).
6. Khoikadah thlah kan si? Kan ke nih a lamhnak hmun paoh hi Bawipa nih a kan thlahnak Mission Field, Thawngtha Chim dingin 'thlah' kan sinak a si (John 20:21; Acts 1:8).

F. Biafang "Thlah" Fianternak.

1. Thlahtu: Pathian hi Thlahtu a si. Cucaah, Mission cu Pathian nih thokmi a si. Pathian mission a si, Pathian hi mission ngeitu a si.
2. Thlahmi: Khrihfabu (zumtu) hi thlahmi kan si. Thlahmi kan si, tinak cu, Pathian mission chungah kan i tel tinak a si. Pathian nih tel khawhnak caan ttha a kan pek caah a si. Cucaah, Khrihfabu cu Mission nih monghmi kan si hrimhrim awk a si.
   1. Miphun nih monghmi si hlah usih.
   2. Ramkhel (politic) nih monghmi si hlah usih.
   3. Vawlei thlihran nih monghmi si hlah usih.
      1. Khrihfabu a tthawng timi cu Mission ah tthawngmi an si. Mission rian kan ttuannak ah i lunghmuih bik hna usih, kan thanuamh bik seh. Kan lungtho bik seh.
      2. Zumtu hmasa hna lungput bang, "Khrihfa paohpaoh hi missionary kan si" timi lungput he rianttuan usih.
3. Thlah Hnawhchan: (1) Khrih Jesuh nih a kan Khamhnak Thawngtha chim ding ah; (2) Khrih Zultu Ser dingah; (3). Pathian Pennak Kauhter ding ah; (4) Cawnpiak ding ah; (5) Khrihfabu dirh dingah thlahmi kan si.⁶
4. Thlahnak Hmun: Kan ke nih a lamhnak hmun paoh hi thlah kan sinak mission field a si (Mark 16:15). Khamhnak a tingco rih lo mi hna, Thawngtha a thei bal rih lomi hna sin ah thlah kan si (Rom. 15:20-21).

G. Zeiruandah Bawipa nih a kan "thlah"?

1. Vawleimi vialte kan sual dih (Rom. 3:23) i, kan sualnak ruangah thi ding kan si (Rom. 6:23; 5:12-21).
2. Vawleimi vialte nih Khamhnak hmu hna seh tihi Pathian nih a duh bikmi a si (1 Tim. 2:3-4).
3. Minung kan thlarau hi a man in cawk khawh lo mi, Khrih thisen lawng nih cawng khawhmi le Thawngtha theih lawng ah khamh dingmi si caah a si (Mark 8:36; 1 Cor. 6:19-20; Rom. 10:14-17).
4. Hell hi a um taktakmi a si. Mi vialte kan thi lai, biaceih kan si lai (Luke 16:19-31; Rev. 20:15; Heb. 9:27).
5. Pathian nih miphun (nation) kip, hrin (tribe) kip, mi (people) kip, le holh (language) phun kip nih ka bia (worship) hna seh, ti a duh (Rev. 7:9-12; Ps. 67:4-5).⁷

DAL 2-NAK: EVANGELISM FIANTERNAK

A. Evangelism Biafang Fianternak.

1. Evangelism timi cu Thawngtha, ti chimnak caah hmanmi Greek biafang "euangelion" in rami a si. Cucaah, "evangelism", asiloah, "evangelizing" ti sullam cu, "Khamhnak Thawngtha chimphuannak" a si.
2. Khamhnak Thawngtha midang va chimh, va hrawmh, va phuan, va cawnpiaknak, va theihter, va aupi, tinak a si.
3. Kan hmurka in chim phuannak a si. Lai dictionary nih, "Thawngthabia Chimnak" tiah a leh. A khen tuk, tiah ka ruah.

B. Evangelism cu, Mission Rianttuannak i, a muru bik a si (Rom. 10:14-17).

1. Mission rian kan ttuannak ah hmurka in Khrih Thawngtha chim phuannak aa te lo ahcun pakpalawng a si. Charity le organization sawhsawh he kan i khat ko hnga.
2. Evangelism cu Pathian lungthin ah a lianngan bikm le Pathian nih biapi bikmi ah chiahmi a si – Thawngtha chim phuannak in thlarau tlau tlaih (soul winning) hi Pathian nih a duh bikmi a si (John MacArthur).
3. Bawipa nawlngaih timi cu, miphun vialte sin ah KAL i, Khrih Thawngtha chim phuan le Khrih zultu ah ser hi a si (John Stott).
4. Khoika hmun paoh le zeitik caan paoh hi, Khrih sal le hna cu Thawngtha chim phuan dingin nawlpekmi tang ah ummi kan si (J. I. Packer).
5. Mi nih khamhnak co ve hna seh, tiah siaherhnak le zawnruahnak na ngeih lo ahcun, na co mi khamhnak hi ka lunghring (Ray Comfort).

C. Chim lo ngah lo; Kal lo ngah lo, Rian Lianngan.

1. "Vawleicung khuazakip ah va kal ulaw, miphun kip kha Thawngtha va chim hna u" (Mark 16:15).
2. "Zumhnak cu bia theihnak thawng khan a um" (Rom. 10:17). Sihmanhsehlaw:
   1. Bia kha an theih lo ahcun zeitindah an zumh khawh lai?
   2. An zumh lo cun zeitindah khamh cu an si khawh lai?
   3. Khamh an si nakhnga, Thawngtha an zumh a herh.
   4. An zumhnak khawh nakhnga an theih a herh.
   5. An theih khawhnak hnga chimtu an um a herh.
   6. Chimtu an um khawh nakhnga thlahmi an um a herh.
   7. Thlahmi an um khawh nakhnga thlahtu an um a herh.

D. Timhtuahnak:

1. Thawngtha chimh na duhmi minung min ttial hna.
2. Pehzulh tein an caah thlacampiak zungzal hna.
3. Thawngtha va chimh khawhnak caan ttha, caan rem hmuhnak lam kawl.
4. Pathian i bochan.

DAL 3-NAK: MISSION RIANTUAN NINGCANG (THE MODEL).

Mission Rian le Zultu Ser Rian hi a biapit tluk tein a harmi rian a si ve. Khrihfabu chungah kan hmuhning le ruahning aa dannak an um tawn. Kan mawh lo. Kanmah lawng si loin Bible lei mithiamsang (scholar/theologian) zong an hmuhning aa dannak um ve ko. Zeicahtiah, Mission Rian cu a kau tukmi rian, ttuan zong a har tukmi rian, chawva, thinlung, ruahnak, le thazang tampi a dihmi rian a si caah a si.

Mission Rian cu a kauh tuk ca le a har tuk caah kan khrihfabu thazang zohchih lengmang in kan ttuan a biapi ngaingai, tiah ka ruah. Bawipa nih chawva a kan zaangfahmi, chungtel thazang, le thluachuah a kan pekmi hruaitu thazang zohchih in rian kan ttuan ding a si, tiah ka ruah.

US Lai khrihfabu nih mission rian kan ttuan khawh dingmi hi a tlangpi in tthen (3) in ka tthen:

1. Local Mission (Khrihfabu chung le kan umnak hmun i rianttuannak).
2. Global Mission (Vawlei khuazakip ah Thawngtha chimnak).
3. Holistic Mission (Taksa lei luatnak le misifak, harsa bawmhnak).

Part A: Local Mission (Khrihfabu chung le kan umnak hmun i rianttuannak).

1. Pawngkam zumlotu minung le khrihfabu kan umnak hmun (khua) ah Thawngtha chim phuannak le Khrih Tehte Sinak in Mission Riantuannak:

1. Engage the City:⁸
   1. Khrihfabu kan umnak khua hi fel tein hlathlainak tuah ding. Khua zung, police zung, rianttuantu phu, le bochanmi hruaitu hna he biaruahnak, hawikomhnak, le pehtlaihnak ser ding.
   2. Cheukhat khua ah cun misifaak tampi an um; sii nih a tlaihmi hna tampi an um; zuu sal ah taangmi chanhchuah haumi tampi an um; biakinn phan lo in a vaivuanmi mino zong an um. Tarnu tarpa tampi an um; inn rawkmi remh herhmi tampi an um; ei awk din awk ngei lo tampi an um.
2. Tuanchuah Ding (Action Steps):
   1. Prayer walk: Khua chung lam kan zawh lai; lam cung ummi inn vialte caah thla kan cam lai. Minung kan hmuhmi hna bia kan ruah hna lai.
   2. City Offices: Sianginn ah thla kan va cam lai; siizung ah thla kan va cam lai; cozah zung ah thla kan va cam lai; police zung ah thla kan va cam lai; fire hmunhma ah thla kan va cam lai; thonginn ah thla kan va cam lai. Donation kan tuah lai.⁹
   3. Community Park kan thian lai. Tar Zohkhenhnak inn ah bawmhnak kan pe lai; thla kan va cam lai; rian kan va bawm hna lai. Tar inn rawkmi remhpiak le an ram riampiak tibantuk ah thazang kan chuah lai.
   4. Pawngkam sianginn le siizung ah donation kan tuah lai.
   5. Homeless shelter ah kan kal lai. Angki le bawngbi khrihfabu ah thawngthanhnak tuah i hluter ding; thawngtha van chim ding; bawmhnak va pek ding.
   6. Khua chung tarnu, tarpa bazaar kaipiak; an inn rawkmi remhpiak, an inn ram riampiak.
   7. Sianginn, siizung, le thonginn, asilaoh, city office pawl Bible le tracts phawtzamhnak kan tuah lai.

2. Thawngtha Chim Phuannak Cawnnak (Evangelism Training).

1. Zumtu kan dihlak hi Thawngtha chim ding ah Jesuh nih nawlpekmi le thlahmi kan si (Mark 16:15; John 20:21). Nain, kan chim awktluk hin kan chim lo, tiah ka ruah. Aruang cu, kan thiam/hngalh lo ruangah a si. Cu ruang ah kan chim lo; kan ralchia, kan ttih. Cucu, Khrihfabu nih ttha tein Evangelism Training te hna kan rak ngeih lo ruangah a si. Thawngtha chim cu a biapi tukmi a si zeidang training nak hmanh in tuah bik dingmi a si, tuah lengmang ding a si fawn, tiah ka ruah. Miraang khrihfabu, asiloah, organization, association, le convention huap hin kum fatin an tuah, tiah ka ruah. Youth Evangelism Summit, tiah min hna an pek. Mino tampi an chuak. Thawngtha chim ning cang, a herhnak kong, le thathawhnak bia tampi an chimh hna. Cu bantuk cu kannih Laimi khrihfabu zong nih kan tuah ve dingah a biapi hringhranmi a si.
2. Local mission ah kan i hmaithlak dingmi cu mino hi zumlotu an hawikom hna sin ah "Thawngtha Chimmi Mino" le an si khawh ning paoh in "Khamhnak Thawngtha Karhternak Rian" (evangelism) ah aa pumpemi mino chuahter hi a si.
3. Mission field ah "KAL" duhmi le an phaknak hmun paoh ah Thawngtha Chimmi Mino an si khawh nakhnga an Nun Sersiam (equip) hi a si.¹⁰
4. Tuanchuah Ding (Actions Steps):
   1. Youth Evangelism Training" kan tuah lai. Cawn Dingmi:
   2. Zeidah Thawngtha hi a si? Zeitindah kan chim/phuan lai?
   3. Zeitindah mi pakhat hi Pathian leiah ka hruai khawh lai?
   4. Kan zumhnak hi zeitindah kan kilven (apologetically) lai?
   5. Zeitindah zultu ka ser lai? Biaknak dang hi zeidah an zumhnak a si?
   6. Kan sawm tikah mission thiam deuhmi a ttha; a mi kip sawm lo khawh cun a ttha; Mino caah cun Miraang zong sawm ding an si ko.¹¹

3. Short-term Mission Thlahnak.

1. US Ram Mino hruainak le sersiamnak ah thazang an pek ngaimi cu kan Mino Mission Field ah thlah hi a si. US Ram Khrihfabu le Mission Agency an rianttuannak kan dotthlet tikah Mino tampi Mission Field (ram mui) ah an thlah tihi kan hmuh khawhmi a si. Laimi Khrihfabu tampi nih kan phanh khawh rih lo mi dirhmun a si nain duhsah tete in kan hun thok pah cang, tiah ka ruah.¹²
2. Short-term mission hmuitinh cu Bible ah kan hmuh. Mino nih mission thinlung (mind) ngeihnak, mission experience ngeihnak, comfort zone in chuahnak, Thawngtha chim thathawhnak,
3. Mission Field thlah hi Short-term a um (zarh 1-8); Mid-Term a um (thla 2 in kum 3); cun Long-term (kum 3 in a cunglei) a um. Long-term missionary an si nakhnga short-term experience hi an ngeihter hmasa tawn hna.¹³ Short-term an kal hnu ah long-term ca in aa commited mi an tampi (Alice, Steven, medical student). Long-term an kal khawh rih lo hmanh nun tam tuk remhnak le sersiamnak in an hung kir tawn. Short-term mission trip hi discipleship a si. Missionary development a si.
4. Tuanchuah Ding (Actions Steps):
   1. Missionary Pathway ser ding. Khrihfabu chung in short-term or long-term missionary kal duhmi caah hmunhma serpiak; a lam kawlpiak ding.
   2. Student Missionary Development progam serpiak ding.
   3. Mission Training, conference, camp ah mino kalter ding. Tahchunhnak ah:
      1. Mino nih mission fundraising tuah ding.
      2. Vision School (Zarh 8 training).
      3. YG Mission Camp (Zarh 1 training).
      4. Cross Conference (Kum 18-22 karlak siangngakchia ca tuahmi).
      5. Missionary Conference tuahnak ah kalter ding.
      6. Kan umnak association le convention nih tuahmi mission & evangelism training ah register tuahpiak hna i, thlah ding.

Part B: Global Mission: (Vawleicung khuazakip ah Thawngtha Chimnak).¹⁴

1) Missionary Thlahnak.¹⁵

1. Khamhnak Thawngtha chimtu Missionary thlahnak hi khrihfabu nih faakpi in thazaang kan pek a herh (Acts 13:3). Kan thlahmi hna zong harsa lo tein zohkhenh an herh. Tlawmte thlah i, fel tein zohkhenh hi a ttha. Cu nakin a ttha deuh mi cu tampi in thlah hi, ttha te'n le fel tein zohkhenh khawh hi a si.
2. Tuanchuah Ding (Action Steps):
   1. Pathian sin ah thlacam ding (Matt. 9:35-38).
   2. Khrihfabu chung in missionary kalter ding (Acts 13:2-4).
   3. Chungkhar in thlahter ding.
   4. Khrihfabu in thlah ding (partnership).
   5. Bible siangngakchia cawm i thlah ding.

2) Missionary Zohkhenhnak/Dirkamhnak.

1. Khrihfabu nih thlahmi missionarhy a zohkhenh (care) hna a herh (Phil. 4:15-16). Pathian Bia ah zumh awktlakmi (biblically faithful), lungsau in thlarau siaherhnak he Thawngtha chim phuangtu, le khrihfabu dawtnak ngeimi missionary hi kan bawmh hna ding a si (Acts 16:1-3; Rom. 10:14-15; 2 Cor. 8:23; 2 Tim. 4:1-5; 3 John 1-8). Cun, bawmh dingmi missionary kong ah "assessment" tuah khawh cun a ttha. An nuncan ziaza (character), an theitlai (fruitfulness), Bible an hngalhnak (Bible knowledge), sersiammi (equipped missionary), le khrihfabu ah pumpeknak (active membership).
2. Kan hngalh bantukin kan ram cu sifakmi tampi an umnak ram a si. Cu lawng si loin, Covid-19 le Ram Buainak nih a hleice in sifahnak a chuahter i, misifaak an karh i, thil man an kai i, nun khuasak a har chinchin ti cu kan hngalh dihmi a si. Missionary hmanh ttuan kho ti lo in a zaammi le aa ngolmi tampi zong an um hna.
3. Zumlotu lak ah Khamhnak Thawngtha Chim phuang dingin missionary kan thlahmi hna hi an sifah tuk i, nun khuasaknak kong ah an lungretheih tuk ahcun Khamhnak Thawngtha an aupi kho lai lo. Thawngtha an chimmi zong ah an ngaihpiak duh hna lo, zei ah an relpiak hna lo. An sifah ruangah mi nehsawhnak an tawn um lai. Cu nih cun lungdonghnak, thachiatnak, le ningzahnak a chuahter. Thawngtha Rian ah hmualngei in an ttuan kho ti lo. Kawlram ah Pathian rianttuantu bochanmi pakhat nih chimmi cu, "Kawlram ah Pathian rian kan ttuan lai ti ahcun rum a hau ee" a ti. Chim duhnak sullam cu, chawva in va rum, va ngeih, le vai nuamh kha a si lo. Thawngtha kan chimh dingmi minung hna level tluk le anmah nakin tlawmpal tel kan nun khawh lo ahcun Thawngtha chimh awk a harnak kha chim duhmi a si.
4. Atu lio Myanmar Director Pastor Cung Lian Thawng (Peter Pa) hi Zoom in Kawlram mission kong bia kan ruah ah a chim tawnmi cu missionary an harnak kong hi a si. A tawinak in chim ahcun Missionary Zohkhenhnak ah hin US Lai Khrihfabu hi kan chambau ngai. Kum khat ca an lahkhah kan kuat hnu cun dirkamh, thazang pek, le an herhnak ah bawmhchanh aa tim ti lo mi kan lawhmi hi apoi. Kan ruahning in rian an ttuan khawh lo ah kan phunzai i, kan thachia tthan. Paul hi Missionary arak kal lio ah Thonginn chung a um tiang Filipi Khrihfabu nih an bawmh, an dirkamh peng ti kan hmuh. Cu thawng cun Thawngtha Rian kaupi in rian a ttuan kho, ti Bible ah kan hmuh (Phil. 1:3-5; 4:10-20).
5. Africa, ram i Senegal ah Short-term mission trip in ka rak kal. IMB nih thlahmi missionary cu US pastor cheukhat nakin lahkhah tam deuh an ei; inn an damhpiak hna, mawttaw an damhpiak hna i, an fa le sianginn kainak tiang an damhpiak hna.
6. Missionary thlahtu hi local khrihfabu kan si. Local sending church kan rian cu missionary an rianttuannak hmualngeih nakhnga le thazang tthawng ngai in an ttuan khawh nakhnga, le a lungdongh nakhnga lo thlacamnak in, chawva in, biakchawnhnak in, le pehtlaihnak in zohkhenh le dirkamh hi a si.
7. Tuanchuah Ding (Action Steps):
   1. Chawva an herhnak ah siang tein bawmhchanh ding.
   2. An lahkhah pin ah "evangelistic method" caah kuat ding. Tahchunhnak ah, an innpa he pehtlaihnak le dawtnak sernak caah laksawng peknak.
   3. An inn lo remhnak, phone cawknak, mawttaw cycle, siizung umnak tbt.
   4. Missionary an min bulletin ah ttial; Thlacamnak list ah ttial. Ngol loin thlacampiak zungzal ding.
   5. Biakinn vampang ah an hmanthlak le an kongtawi ttial ding.
   6. Report an kan pekmi/kuatmi rel ding; khrihfabu pi sin ah phawt ding.
   7. Pastor le mission team nih tlawn/veh khawh i zuam ding.
   8. Viber, Zoom, le Facebook Messenger in phone chawnh, thawnghal, le thlacampi lengmang ding (regular communication).
   9. Kan mino in short-term mission trip in an sin ah thlah dng a si.
   10. Nuamhnak hmunhma ttha, hmunhma nuam ah kalter tawn.
   11. An rianttuannak ah bawmtu hawi chiahpiak (teammate).¹⁶

3) Mission Field ah:

1. Church Planting: Khrihfabu um hnawhchan cu mission rianttuan a si. Mission ttuan hnawhchan cu khrihfabu dirh a si. Cucaah, mission field ah khrihfabu dirh ding hi kan thlacamnak le hmuitinh a si. House church (inn ah pumhnak ngeihpinak) in thok, cun zumtu an hung karh deuh in biakinn sakpiak ding.
2. Mission Training/School Center Saknak.
   1. Mission rianttuannak ah hmaithlak chih lengmangmi cu sianginn saknak le Pathian rianttuantu, asiloah, zumtu thar hmuhmi hna caah training center saknak hi a si. Zeicahtiah mission rianttuannak ah cawnpiak aa tel, fimter aa tel caah a si.
3. Orphanage Ministry Tuahnak.
   1. Nulepa ngei lo ngakchia tampi an um. Ngakttah zohkhenhnak rian kan thok khawh ahcun hmual ngei ngai dingmi rianttuannak a si. Khrihfabu asilole chungkhar nih thok khawh dingmi rian a si.
4. Khrihfa Sianginn/Siizung Tuahnak.
   1. Missionary nih hmual ngei ngaingaimi a si, tiah an chim. Music sianginn zong a si kho; Miraang holh cawnnak sianginn zong a si kho; Skills training – ttamhnak, sam riamnak, tibantuk sianginn zong tuahnak in
   2. Mission cawnnak ah 10/40 Window timi a um. Cu ram hna cu Thawngtha chim a harnak bik le Thawngtha/khrihfa a dohtu bik ram hna an si. Cu ram luhnak dingah a lam ttha bik i, an ruahmi cu fimthiamnak ngeimi– engineer, medical nurses/doctors, business, sport, le English thiammi hna an si.

Part C: Holistic Mission (Taksa lei luatnak le misifak, harsa bawmhnak).

1) Holistic, Integral, Humanitarian, Mercy Ministry

1. Mission Rian ah aa telmi pakhat cu, (Holistic Mission (humanitarian) hi a si ve. Cucu, misifaak le miharsa cungah zaangfahnak le dawtnak lungthin he "Mibawmh Rian" a si. A cheukhat nih "Mercy Ministry" tiah an auh. Ecumenical lei in, "Holistic Mission" tiah auh deuha si. A concept cu a tlangpi in aa khat ko, tiah ka ruah. A hmuitinh in Tuahsernak, mibawmhnak in Thawngtha chimnak a si.
2. Taksa in luatnak, damnak, dinnak ttanhnak, taksa, thinlung, le thlarau in damnak le luatnak ding caah rianttuannak a si. Hi rianttuannak cu Bible nih a kan cawnpiakmi, a kan fialmi rian a si ve (Matt. 5:13-14; Matt. 22:37; Matt. 25; Luke 10:25-37). Matthai 25:31-45 ah Jesuh nih, "Ka rawltaam i, rawl nan ka pek. Khual ka si i, tlun inn nan ka onh. Puan aih awk ka ngei lo i puan nan ka pek. Ka zaw i, nan ka zohkhenh. Thong ka tla i, nan ka len" timi Pathian Bia hi kan thinlung ah camcin zungzal ko seh law, misifaak le harnak tuarmi kan unau hna caah faakpi in ttuan pehzulh rih ko hna usih.
3. Tuanchuah Ding (Action Steps):
   1. Ral ruangah hliamhma tuarmi ralkap kutke tlamtling lomi bawmhnak.
   2. Thlarau le thinlung lei tthanghphawtnak revival program – Crusade le camping zong tuahpiaknak.
   3. Laitlang ralzaam siizung, kan miphun an i dornak IDP Camp, misifaak/harsa, nuhmei, ngakttah zohkhenhnak, le thi hlutnak phu.
   4. US i Laimi nih tuahmi rehab center: Camp Victoria, Emmanuel Prayer house tibantuk zongah va veh ding; tangka i ken ding; khrihfabu zongah thawngthanh ding si ko; thilpuan, ti/rawl zong i ken ding a si.
   5. Laitlang/Malaysia Lai siangngakchia herhmi bawmhnak.
   6. Homeless shelter.
   7. Prison Ministry.

2) Mission Fundraising.

1. Minung nih vawlei khua kan saknak ah Tangka lo in zeihmanh aa tuah khawh lo bantukin Mission Riantuannak zong ah tangka loin zeihmanh aa ttuan kho ve lo. Adoniram Judson le Luther Rice hi an pahnih tein Myanmar ah Mission rianttuan dingin US in an rak i thawh. Sihmanhsehlaw, Luther Rice cu India an phak hnu in US ah kir tthan. Judson lawng Kawlram tiang arak len kho. Luther Rice US phak hnu in US state tampi le khrihfabu tampi ah Judson le missionary dangdang caah tangka a rak khawl, fundraising arak tuahpiak hna. Cu nak cun Judson nih Kawlram ah rian tampi a rak ttuan khawhmi hi a si, tiah Mission Tuanbia ah kan hmuh. Cucaah, Kawlram Mission Tuanbia thiammi nih Judson kong an chim tikah Luther Rice kong hi an chim chih tawn.
2. Khrihfabu nih Mission Fundraising kan tuahning hi aa dang cio. Lai khrihfabu nih a tanglei thil (4) hmaithlak in Mission Fund kawl khawh a si.
3. Tuanchuah Ding (Action Steps):
   1. Thawhlawm Kholhnak.
   2. Kumkhat Ca Thawhbur.
   3. Fund Kawlnak.
   4. Kum Khat Budget Rianttuannak Chiahpiak.
   5. Kalnak, Peknak, le Thlacamnak in ttuan usih.

3) Mission Lungput (Mindset).

1. Mission Riantuannak Mission Department ca'h lawng a si, ti kan ruah ahcun khrihfabu mission a tthawng kho lo. Kan dihlak in ttuanmi rian a si, kan dihlak hi missionary kan si, kan dihlak kan i tel, timi lungput he ttuan ding a si.
2. Cheuhra-cheukhat kan pekmi lawng in mission kan ttuan awk a si, timi lungput hloh ding. Mission rianttuan cu Khrihfabu um hnawhchan si caah mission ah kan chawva zong tam bik a kal awk si i, kan kut kan samh rih ding a si.
3. Pastor nih mission team hi a hruai awk a si. Mission rianttuannak vision, strategy, le budget zong chuahpitu ding a si. Mission rianttuannak ah a bawmtu bik ding cu mission department hruaitu an si. An bawmh khawh nakhnga le rianttuan an thiam nakhnga pastor nih training, orientation, le equip tuah hna lai. Rian a phawt hna lai.
4. Mission rian kan ttuan awk tluk in kan rak ttuan khawh tawn lonak aruang pakhat cu khrihfabu bylaw le leadership structure ruangah rak si tawn. Mission Team hi zalong tein rian kan ttuanter hna ding; rianttuannak nawl kan pek hna ding a si. Rian an ttuan dingmi kong meeting ah chuahpi tthan lengmang si tikah rian hma kal kho lo; a fum deuh. A vaivuan ttheu tawn. Hruaitu daithlannak, thachiatnak, le lungdonghnak a chuak tawn.
5. Mission hi nawl ngaimi lungput (obedience mindset) he ttuan ding a si.
6. Mission hi dawtnak lungput he ttuan ding a si.
7. Mission hi siannak lungput he ttuan ding a si.
8. Mission hi ttuanvo lak duhnak lungput he ttuan ding a si.
9. Mission hi Pathian biaknak lungput he ttuan ding a si.
10. Mission hi zumhnak lungput he ttuan ding a si.

¹ the Great Commission cannot be fulfilled without individuals sharing the gospel and teaching others; Leeman, Jonathan; Dever, Mark. Understanding the Great Commission (Church Basics) (p. 2). the Great Commission is normally fulfilled through planting and growing local churches.

² The Bible tells us that the church's mission is to display the glory of God by declaring the gospel to all peoples, by gathering churches in every place, and by filling them with disciples who obey God and will praise him forever for his grace (Isaiah 56; Matt. 28:18–20; Rom. 15:7–13; Eph. 3:8–11; Rev. 7:9–10). Johnson, Andy. Missions: How the Local Church Goes Global.

³ Khrihfabu i, ministry department kip leader hi pastor kan si.

⁴ The mission of God has always been a sending program. Sproul, R.C. What Is the Great Commission? (Crucial Questions).

⁵ Sproul, R.C. What Is the Great Commission? (Crucial Questions).

⁶ Tipil-peknak le khrihfabu dirhnak hi aa khat, aa peh, tthen awk an ttha lo.

⁷ Mission exists, because of worship doesn't – John Piper (Let the Nations be Glad); Calling and discipling all the peoples saved by the Lamb is the primary mission of missions (Andy Johnson, Missions: How the Local Church Goes Global).

⁸ Kan Umnak Khua Hlathlainak Tuah Ding.

⁹ Sianginn kai lio ah Bible study session tuah khawhnak a lam kawl.

¹⁰ Radical cauk ah David Platt nih biapi tuk in chimmi pakhat a si.

¹¹ Tahchunhnak ah: Missouri Baptist Convention i, Youth Evangelism Director kan rak sawm; South Korea in Korean missionary, a no lio tein missionary kalmi le mino sin ah Mission rianttuannak kong aupi lengmangmi kan rak sawm.

¹² 2024 ah mino (47), 2025 ah mino (25): Total: 72, zarh (8) chung Mission Training kan pek hna. Young Generation Mission Camp ah ah voi (3) kan thlah hna. Hi vialte training nih a theipar chuahpi seh ti kan ngeihmi chunmang cu Mission Field ah thlah ding mino chuahter a si.

¹³ Keeping the Long-term in View.

¹⁴ Global Missions Is Primarily through the Local Church; Johnson, Andy. Missions: How the Local Church Goes Global. The church was God's idea. It is his one and only organizational plan for world missions.

¹⁵ The local church sends out missionaries (Acts 13:3) and cares for missionaries after they are sent (Phil. 4:15–16; 3 John 1–8). And healthy, reproducing local churches are normally the aim and end of our missionary effort (Acts 15:41; Titus 1:5); Johnson, Andy. Missions: How the Local Church Goes Global.

¹⁶ Send, Support, and Love them well.