Rev. Sui Hliang Chorei

Keimah ka min cu Sui Hliang Chorei a si. Laitlang ka chuahnak khua cu Hmawngtlang, Thantlang peng a si. 

CBCUSA Women Department ah Women Director a ṭuan lio mi ka si. 2018 – 2022 hi volunteer in Women Director ka rak ṭuan i July 2022 CBCUSA election ah fulltime Women Director ah an ka thim hi a si. Women Director term hi kum 4 a si caah ka term a dih cun ka Khrihfabu CBMC ah ka kir ṭhan te lai. 

Ka umnak Khrihfabu le Pastor ka ṭuan nak cu Chin Baptist Mission Church, Maryland DC Area ah a si. CBMC ah hin 2012 in Pathian rianṭuan ka thawk i 2014 ah CBCUSA nih ordination a ka pek. 

• 1991 - 1992 Phaikhua ah Pastor ka rak ṭuan 
• 1992 - 1993 Hmawngtlang ah Pastor ka rak ṭuan. 
• 1991 - 1993 chung hi Pastor ka ṭuan buin Bawipatlang Area Nubu Secretary ka rak ṭuan chih. 

Laitlang ah Pathian rian kum 2 ka ṭuan hnu ah India ram Madras/Chennai i Serampur Affiliate Bible sianginn hna ah cacawn ka rak peh i Bawipa thawngin B. Th, BD le Master of Theology ka rak dih. Kan ram a ṭhat lo tuk ruangah kir kho lo dir hmun ka phak caah ramdang ah ka chuak. 

Japan ah sianginn kai pah ruah ah 2000 ah ka rak kal nain saduhthah bantukin Bible siangin le sponsor ka hmu kho lo, thla zeimawzat ka um hnu ah, Pathian rian ṭuan loin rian dang ṭuan in phaisa tampi hmuh nak cun Pathian rian ṭuan ka duh deuh, Pathian nih a rian ṭuan dingah a ka thimmi fanu ka si caah ni khatkhat cu lam a ka awn piak te ko lai ti zumhnak he 2001 ah Japan in India leiah ka rak kir. Mi tampi nih mah tluk in Japan kal a har lio ah a kir hi a mawlh maw tiah an ka sawisel ko nain, vulei rian ṭuan i rum nak cun Pathian rian ṭuan ka duh deuh i Pathian rian ṭuan kai thim deuh caah a si.

• 2003 – 2004 - St. Peter Claver Primary School, Kingston, Jamaica ah Volunteer ka rak ṭuan. 
• 2004 – 2005 - Liberty Accounting and Secretarial Services ah Private business ah Personal Secretary le - UNDP office, Kingston, Jamaica ah volunteer le Free Lance Interpreter ka rak ṭuan. 
• 2005 – 2007 - United Nations High Commissioner for Refugees office, Malaysia ah IUNV in December 30, 2007 tiang ka rak ṭuan. Kan ram ṭhat lo ruangah kan ram ah um kho le Pathian rian ṭuan kho loin um hmanh ninglaw ram le miphun ca ṭuan zong hi Pathian rian ṭuan a si ko ti ka zumh caah le harnak a tawngmi ka miphun ralzam hna zawn ruahnak he ralzam bawmhin an caah rian ṭuan ding ah UNHCR, Geneva ah rian ka sawk, UNDP office Jamaica ah training an ka pek hnu ah ka umnak Jamaica in Malaysia i United Nations High Commissioner for Refugees office ah ka rak ṭuan nak a si. 
• 2010 - 2021 - State Farm Auto Insurance Agent, Maryland, USA ah chun ah ka ṭuan pah in East Coast Fresh ah Administration Associate zan ah ka rak ṭuan. 2011 - 2012 - Quality Assurance/Quality Control Manager in Product Engineer dir hmun tiang Pathian nih ka phu ka tawk loin a ka cawisan. Pathian cungah kalawm i amin ka thangṭhat ko. 
• 2010 – 2012 - International Rescue Center, Maryland Siizung le sianginn ah interpreter parttime in ka ṭuan 2012 ah Chin Baptist Mission Church ah full time Pastor dingin kan in herh an ka ti tikah, Bawipa nih a rian ṭuan dingin a ka auh ṭhan ti ka zumh caah company i rian ṭha vialte ka chiah dih i, 2012 in nihin tiang hi Khrihfabu ah Pathian rian ka si khawh tawk tein ka ṭuan nak a si.

Pathian rian ṭuan dingin an ka sawm caah rian ka chuak lai tiah Eat Coast Fresh company ngeitu pakhat a si vemi Dave Z ka chimh lio i “God’s calling is the most powerful than anything” tiah a rak ka ti mi bia hi ka philh kho lo. Ka caah cun a dik tuk, Pathian Auhnak hi zeidang nak in a ṭhawng bik i hmual a ngei bik ko. Joshua nih Israel mi hna sinah “kei le ka innchungkhar nih cun Bawipa rian lawng kan ṭuan ko lai” a ti bantukin ka dam chung cu kei le ka innchungkhar nih cun Bawipa rian lawng kan ṭuan ko lai ti hi kan i sehchih mi le tinhmi a si.